Хүүхдэд хөгжим сонсгож хөгжүүлэн хүмүүжүүлэх нь

Дон Кампбелл нь хөгжим, хүүхэд хоорондын нарийн шүтэлцээ, хамаарлыг түүнчлэн хөгжим бол зөвхөн хүний сэтгэл оюуныг тайтгаруулагч байгаад зогсохгүй анагаах, өвчнийг илааршуулах, сэтгэлийн зовлонгоос ангижруулах, амьдралын эрх хүчийг нэмэгдүүлэх асар их хүч юм гэдгийг шинжлэх ухаан, судалгаа, туршилтын үндсэн дээр ул суурьтай судалсан, өнөөдрийн байдлаар энэ салбар судалгаагаар дэлхийд хүлээн зөвшөөрөгдсөн дорвитой цөөн судлаачийн нэг юм. Тэрээр энэ цаг үед хөгжим нь хүүхдийн хэл яриа, хөдөлгөөн, сэтгэл хөдлөлийн чадварууд, гоо зүй, урлагийн мэдрэмжийг хөгжүүлдэг, тодорхой өвчин эмгэгийг анагаах төгс арга хэрэгсэл мөн болохыг гэр бүл, сургууль, цэцэрлэг, тэдний тоглож нааддаг аль ч орчинд бодитоор харуулсаар байна. Хүүхдийг эхийн хэвлийд байхаас 10 хүртлэх насанд, тэдний өсч торних үе шат, насны онцлогт нь тохирсон дуу хөгжим, авиаг энгийн, хөгжилтэй дасгал, хөдөлгөөн, үйл хөдлөлөөр дэмжин сэтгэн бодох чадварыг ердийнхөөс түргэн хугацаанд хөгжүүлэх шинэ арга замыг эцэг, эх, багш сурган хүмүүжүүлэгч нарт нээн харуулсан төдийгүй, хүүхдэд нуугдаж буй асар их нөөц бололцоо, хүчин чадлыг хөгжмийн тусламжтайгаар нээн илрүүлэх бүрэн боломжтой болохыг судалгааны үндсэн дээр хамгийн үнэмшилтэйгээр гаргаж тавьсан.
Зөв хөгжмийг зөв үед нь зөв сонсгох нь таниас хүүхдийнхээ амьдралд өгч буй маш том бэлэг, тус гэдгийг энэхүү номонд өгүүлжээ.