Монгол хүний шийдвэр гаргалтын онцлог: өнөө үед

Нийгмийн сэтгэлгээнд томоохон шилжилт болсон 1990 оноос хойш төрсөн үеийнхнийг шинэ үе гэж нэрлэж болох уу? Тийм бол энэ үеийнхний шийдвэр гаргалтын онцлог хэрхэн өөрчлөгдсөн тухай санаа оноог мөн энэ үеийг төлөөлөн буй сэтгэл судлаач Б.Энхмаатай хуваалцлаа. Тархи судлал, сэтгэл судлал, антропологи, соёл судлал, философи, компьютерийн шинжлэх ухаан зэрэг Когнитив шинжлэх ухааны олон салбарыг хамруулан тайлбарлах ёстой том сэдэв учраас энд яригдсан дүгнэлт бол өнгөцхөн, ерөнхий тул та бүхэн цаашид гүнзгийрүүлэн судлана биз ээ. Мөн санал сэтгэгдлээ хуваалцах аваас бид дээрхи олон салбарын судлаачидтай хамтран энэ сэдвийг дэлгэрүүлэн хөндөх болно.