Хайр дурлалын сэтгэл зүй

Үе үеийн хүмүүсийн мэдэрч, догдолж, баярлаж, гуньж, үзэн ядаж, энэрч нигүүлсэж ирсэн энэхүү хайр дурлалын мэдрэмж нь хүний сэтгэл зүйн ямар утсыг хөндөж, ямар нөлөө үзүүлдэг талаар бичсэн бүтээл харьцангуй цөөн байдаг. Иймээс бид өсвөр залуу үеийнхэн, оюутан залуучууд, сэтгэл судлалын шинжлэх ухааныг сонирхогчид, эрхэм уншигчид Та бүхэндээ энэхүү хайр дурлалын сэтгэл зүйн талаарх бүтээлээ өргөн барьж байна. Хайр дурлал хэмээх энэхүү эерэг сэтгэлийн хөдөлгөөн нь хүнд итгэл үнэмшил, баяр баясгалан, аз жаргал, эрч хүчийг өгч, хүнийг сэдэлжүүлж, сэргээж идэвхжүүлж өгдөг онцгой хүч болдог. Таалагдал, дотносол, сэтгэл татагдал зэрэг харилцааны нарийн мэдрэмжүүдийг бий болгохын зэрэгцээ хүнийг сайн сайхан, уян зөөлөн, өгөөмөр болгох зэргээр зан төлөвийн өөрчлөлтийг бий болгодог. Мөн эсрэгээр үзэн ядах, хардах, өөртөө итгэлгүй болох, сандрах, айх түгших зэрэг сөрөг сэтгэлийн хөдөлгөөнийг ч араасаа дагуулдаг. Ийм хүчтэй сэтгэлийн хөдөлгөөний онцлогийг сэтгэл судлалын шинжлэх ухааны талаас уншиж, өөрийн хайр дурлалын харилцаандаа ашиглах, энэ талын мэдлэг, туршлага хуримтлуулахад нэмэр болно. Хайр дурлал гэж юу вэ, Хайр дурлалын төрөл,  Хайр дурлалын талаарх онолууд, Хайр дурлалд нас, хүйс, Хайр дурлалын хэл ба дохио зангаа, Хайр дурлал ба гэрлэлтийн хэмээх бүлгүүдтэй.