Зан төлөвшлийн нүцгэн толь

Сэтгэл зүй гэж юу вэ? Сэтгэл зүйн ямар төрлүүд байдаг вэ? Сэтгэл зүй хэрхэн бүрэлддэг юм бол? Сэтгэл зүйн хоорондын ялгаа, тэдгээр ялгаанууд тэнцвэртэй байхын ач холбогдол нь юу юм бол?
Хүнийг бие махбод, оюун ухаан, сэтгэл гэсэн гурван зүйлийн нэгдлээс бүрэлддэг гэж үзвэл бие махбодын хувьд хүн нь өндөр, нам, тарган, туранхай, шар, хар, цагаан арьстан гэх мэтчилэн гадна талаас нь харан төвөггүйхэн ялган таньж болдог. Оюун ухааны хувьд сурч боловсорсон мэдлэг, боловсрол, гаргаж буй санаачилга, асуудлыг шийдвэрлэх аргачлал зэргээр мэдэж болно. Харин  сэтгэл зүйн хувьд хүнийг таньж мэдэхэд тун нарийн мэдрэмж, ойлголт хэрэгтэй болохоор үүнд суралцах нь маш чухал юм. Учир нь хүний сэтгэл санаа бол маш олон элементүүдийн нэгдэл байдаг болохоор төрж өссөн орчин, туулж өнгөрүүлсэн амьдрал, өсөх явцдаа өөрийн төлөвшлийн давуу тал болгон хөгжүүлсэн үнэлэмжүүдээр хэмжиж болох юм.