МУСГЗ, Д.Нацагдоржийн шагналт  зохиолч Санжийн Пүрэв 1941 онд Говь-Алтай аймгийн Дарив сумын нутаг “Хараатын их гашуун” гэдэг газар Вандангийн Батмөнх, Хайдавын Дарьсүрэн нарын  5 дахь хүү болон төрж, тус сумын 6 дугаар багийн малчин ард Авирын Санжийнд үрчлэгджээ.
1948 онд Дарив сумын бага сургууль, 1960 онд Улаанбаатар хотноо Худалдааны техникумыг төгссөн. 1961 оноос Налайхын их уурхайд шилжин малтагч, слесарь болсон.
С.Пүрэв 1962-1965 онд Шарын гол, Дарханд Барилгын цэргийн 6 дугаар батальон буюу 030 дугаар ангийн штабын нууцын бичээчээр цэргийн албан хааж, 1965-1969 онд Налайхын их уурхайд слесарь, Налайхын ХЗЭ-ийн хороонд зааварлагч, Эвлэлийн байгууллагын хэлтсийн эрхлэгчээр ажилласан байна.
1969 оноос Мэдээлэл Радио, Телевизийн Улсын хороо Сургууль хүүхдийн нэвтрүүлгийн редакцид редактороор ажиллаж байгаад 1975 онд ЗХУ-ын Москва хотноо М.Горькийн нэрэмжит Утга зохиолын дээд сургуулийн Хүүрнэл зохиолын ангид, Оросын өгүүллэгийн нэрт мастр, ахмад зохиолч, Нобелийн шагналт Иван Бунины дотно анд асан Владимир Германович Лидин агсны уран бүтээлийн семинарт суралцаж Утга зохиолын ажилтан мэргэжил зэмшсэн. Мөн энэ завсар УБДС-ийн монгол хэл уран зохиолын ангийг 1976 онд эчнээгээр дүүргэж Монгол хэл уран зохиолын багшийн мэргэжил эзэмшжээ.
1980 оноос МЗЭ-ийн Төв хэвлэл “Утга зохиол, урлаг” сонинд утга зохиолын ажилтан, хариуцлагатай нарийн бичгийн дарга, орлогч эрхлэгчийн албыг 13 жил хашиж, 1993 оны 8 сарын 18-аас МҮОНР-гийн Урлаг соёлын албанд редактор, албаны даргын ажлыг тасралтгүй хашиж байгаад 2002.9.1-ээс өөрийн хүсэлтээр өндөр насны тэтгэвэртээ гарсан.
Хэвлэгдсэн ном: Роман-13, Туужийн түүвэр-14, Өгүүллэгийн түүвэр-16, Шүлгийн түүвэр-2 хэвлэгдэн гарсан.